Poder para transformar 30 vidas

O venres 25 de Novembro, día Internacional contra a Violencia de Xénero, o alumnado de Convivencia e Mediación asistiu a unha actividade no salón de actos. A ONG Ecos do Sur presentounos  a  súa campaña Poder para transformar 30 vidas. Trátase dunha campaña de crowdfunding para axudar a 30 mulleres sobreviventes da violencia de xénero.

A charala consistiu en explicarnos o que fan en Ecos do Sur cando lles chega unha muller maltratada. 

Fixemos un "xogo" no que unha alumna representaba o papel dunha vítima e os demais puxémonos no lugar desas mulleres. Algúns até se emocionaron!

Foi un obradoiro moi interesante no que as rapazas e rapaces aprendemos moitas cousas.

@Edenavecilla

Rap pola igualdade de xénero

O luns 21 deste mes, o alumnado de 3º da ESO tivemos un obradoiro de rap con Diego Calatayud, no salón de actos do instituto. Comezou falando sobre os seus inicios e facendo unha pequena demostración de como rapea, fíxoo moi ben. Comentou temas moi interesantes, por exemplo, sobre o sexismo no mundo da música e como facer para ir borrándoo se alguén quixese adicarse ao rap. E, se algunha moza quere facer rap, que a lembren e a admiren polas súas rimas e non polo seu físico. Tamén comentou que este estilo de música axuda a exteriorizar os problemas.
Unha historia moi interesante foi que un dos alumnos que asistiron a un taller similar impartido por el sufría bullying por parte dalgúns compañeiros da clase. Entón comezou a rimar e cada vez que alguén facía un comentario despectivo e pouco orixinal cara el, respondía con rimas e  deixábaos sen fala. Finalmente rematou cunha improvisación moi boa e convidando aos que quixesen a subir con el e a tentar rimar algo sinxelo. Animáronse Ángel e Christian, estaban nerviosos, pero fixérono ben.
En resumo, foi un obradoiro moi interesante e no que se aprendeu moito. Oxalá se sigan facendo actividades así de boas para todo.o alumnado!

@MartaAnonymous

Semana contra a violencia de xénero

Entre o luns, 21 de novembro, e o venres, 25 de novembro, no IES David Buján vanse desenvolver as seguintes actividades:

• Durante a semana, todo o alumnado está convidado a encher o Taboleiro homenaxe ás mulleres vítimas do maltrato. Os rapaces e rapazas do Centro poderán traer unha flor natural á que se lle engadirá unha tarxeta cunha mensaxe de apoio a unha destas mulleres.

• Desde o luns, a música nas diferentes linguas estará presente nos períodos de lecer. Trátase de reflexionar sobre as mensaxes contidas nas cancións.

• O luns –entre as 16:45 e as 18:10- o alumnado de 3º da ESO participará nun Obradoiro de Rap sobre igualdade impartido por Diego Calatayud. A idea é compoñer un rap de denuncia desta forma de violencia.

• Desde Normalización Lingüística vaise promover unha recreación visual do poema "Baldosas" de Carlos Negro. Estará instalada toda a semana no vestíbulo do centro.

• Ao longo da semana o alumnado de 3º de PMAR realizará a gravación dunha curta sobre violencia machista, con guión de Yanira Gabarri.

• O venres 25 de novembro, durante o primeiro recreo, proxectarase o lipdub sobre igualdade, organizado polos Servizos Sociais do Concello co alumnado de 2º de ESO. Durante o segundo recreo un grupo de rapaces e rapazas de 1º Bach. plasmarán unha interpretación particular dun tableau vivant, neste caso non tomarán como modelo un cadro senón unha situación de violencia de xénero. O mesmo día, para o alumnado do grupo de Convivencia e Mediación a ONG Ecos do Sur fará a presentación da súa campaña “Poder para transformar a súa vida”. Trátase dunha campaña de crowdfunding para axudar a 30 mulleres sobreviventes da violencia de xénero.